晌呢度要多謝我老公先，肯俾我去私家生BB 😗😗 多謝嗮米飯班主 😜😝
我想去私家生既原因唔係信唔過公立醫院，相反晌今次孕期當中，公立醫院俾到一個好好既印象我，令到我完全改觀，香港不愧係一個先進既城市。
我選擇私家原因係因為我想開刀，我對自己忍痛能力同埋用力生個BB出來都冇咩信心😓😓我都預左去公立好大機會會「食全餐」。反正都係開刀，寧願晌私家醫院度直接開刀算 💪💪
我參加左仁安既剖腹生子PACKAGE - 5日4夜
- 有4人房 /2人房/私家房選擇
因為我朋友之前晌其他醫院有遇過變態既同房，所以我選擇左2人房。但聽到好多媽媽分享，如果4人房full 嗮，會有得upgrade 去2人房 。upgrade 的話，照補返房價差額，但醫生費/其他醫療費用會跟返2人房價錢。
我BOOK 2 人房，有特別remark 係新翼。因為新翼D房新D，同埋近餵奶房，唔洗行太遠 😇😇
私家房好似會跟返房型再有額外收費，因為實在係負擔唔起，所以我都冇理到呢個option 😅😅
仁安生BB令我好舒服既地方
輕便的走佬袋
基本上都冇咩要帶，大部分既野仁安都會有提供，例如： 床墊、網褲、孕婦衛生巾等等。最主要都係帶叉電器，因為你會係咁玩電話 :P 當然都有野係自己要令，但相對地簡單方便好多。我入院果時未執好果袋，但都冇太大影響。
靚同乾淨既環境同設備
我特別request 要住新翼，感覺真係好似酒店咁。廁所同浴室都好乾淨，定時定侯會有姐姐入來清潔。而且熱水、薑水果D都會有姐姐來幫手換，就算凍左都唔怕。如果你有需要，都可以隨時打電話叫姐姐來換。
好味既餐廳/膳食（雖然做開刀媽媽唔係好感受到😢😢）
仁安醫院既蘭亭閣係十分出名，我老公來探我既時候都order 左佢地既漢堡包，佢話好好食😆 因為開刀關係，我只能夠食得好清淡。基本上我日日都係叫粥 / 通心粉來食。只能說不過不失，但我見媽媽group 既順產媽媽，食得真係唔錯😚😚
無論係醫生、姑娘、同埋姐姐，大家對你都好好。尤其我做手術既時候，除左有不嬲睇開既產科醫生，幫我手既麻醉科醫生超級溫柔，非常好人！人地個個都話種豆好痛，但佢手勢好好，我自己唔覺得痛，同埋佢同D姑娘都不斷安慰我，叫我唔洗緊張。對於突然間作動同埋第一次生仔既我，係好大鼓勵。
小遺憾
仁安唯一一樣野做得唔太好，就係佢D位置。佢有電製提供，但離床有D遠，所以你一定要帶條夠長既叉電線。另外好多姑娘都會打電話俾你，但個電話晌床頭櫃，有D遠... 同埋開刀唔太郁得，成日聽佢電話都扯到傷口。
整體來講我都會俾9/10分呢個生仔經驗 :)
0 意見:
張貼留言